Бидний тухай

   Та бүхний энэ өдрийн амар амгаланг эрин мэндчилье. Намайг Кобаяши Хироюки гэдэг бөгөөд Япон улсаас Монгол улсад суугаа Онц бөгөөд Бүрэн эрхт Элчин сайдаар томилогдон ирээд байна.   
   Миний бие 2019 оны 12 дугаар сарын 20-ны өдөр Монголд ирээд 25-ны өдөр Ерөнхийлөгч Х.Баттулгад итгэмжлэх жуух бичгээ өргөн барилаа. Энэ удаагийн албан томилолтыг оруулаад Монгол улсад нийт 3-н удаа томилогдож байгаа бөгөөд хоёр дахь төрсөн нутагтаа эргэж ирсэн мэт сэтгэгдэл төрж байгаа ч 2005 оноос 2008 оны хооронд ажилласан хоёр дахь томилолтын үетэй харьцуулахад Улаанбаатар маш их өөрчлөгдсөн байгааг хараад гайхширлаа.
   Өнгөрсөн жил Япон улс Рэйвагийн он тоололд шилжсэн билээ. Хэйсэй он тооллын 30 орчим жилд нь Монгол улсад ардчилал хөгжсөн түүхэн жилүүдтэй давхцаж мөнхүү он жилүүдэд Япон, Монгол хоорондын харилцаа үсрэнгүй хөгжсөн билээ. Рэйвагийн эрин үед Монгол улс ардчилсан тогтолцоогоо бэхжүүлэн, илүү хөгжин цэцэглэж, Япон, Монгол хоёр орон найдвартай хамтрагчид болоосой хэмээн маш их найдлага тавьж байна. Рэйвагийн он тооллын эхэн үед, Япон улсаас Монгол улсад суугаа Элчин сайдын хувиар ажиллах болсон нь үнэхээр нэр төрийн хэрэг хэмээн бодож байгаагийн зэрэгцээ маш том хариуцлага оногдож байгааг мэдэрч байна. 
   Өдийг хүртэл Япон улс бүхий л төвшинд хөгжүүлж ирсэн Япон, Монголын хоорондын найрамдалт харилцааг улам илүү хөгжүүлэхийн төлөө өчүүхэн миний бие өөрийн бүхий л  хүчин чадлаа дайчлан ажиллах тул та бүхэн тусалж дэмжиж байхыг чин сэтгэлээсээ хүсье.
   Энэ жил Токиогийн Олимп, паралимп зохион байгуулагдана. Дэлхийн бүх өнцөг булан бүрээс хүмүүс цугларах энх тайвны баяр наадамд оролцохоор Монгол улсаас ч олон тамирчид, дэмжигчид зорино биз ээ. Энэхүү наадам нь Япончууд болон Монголчууд хоорондын харилцан ойлголцол улам гүнзгийрэх, зөвхөн спорт төдийгүй улс төр, эдийн засаг, боловсрол, соёл зэрэг олон салбарт хоёр орны харилцаа улам илүү эрчимжих сайхан боломж болоосой хэмээн чин сэтгэлээсээ хүсэн ерөөж байна.