Олон улсын шүүхээр хэлэлцүүлэхийг санал болгож буй нь

　　1.         БНСУ “Ри Синманы шугам”-ыг тогтоосноос хойш БНСУ-ын тал Такэшимад явуулж буй эзэмших эрхээ батлах, загасны аж ахуй эрхлэх, эргүүлийн усан онгоц руу буудах, барилга байгууламж барих зэрэгт манай улс тухай бүр хатуу эсэргүүцлээ илэрхийлж ирсэн. 　　2.         Энэ нөхцөл байдал дунд манай улс Такэшимагийн асуудлыг энх тайвны замаар шийдвэрлэх зорилгоор 1954 оны 9 дүгээр сард Такэшимагийн эзэмших эрхтэй холбоотой маргааныг Олон улсын шүүх (ICJ)-ээр хэлэлцүүлэх тухай саналыг БНСУ-ад нот бичгээр уламжилсан ч мөн оны 10 дугаар сард БНСУ уг саналаас татгалзсан (жич 1) билээ. 1962 оны 3 дугаар сард Япон, БНСУ-ын Гадаад хэргийн сайд нарын уулзалтын үед ч тухайн үеийн Гадаад хэргийн сайд Зэнтаро Косакагаас БНСУ-ын тухайн үеийн Гадаад хэргийн сайд Чой Дог Шинд хандан энэ хэргийг Олон улсын шүүх (ICJ)-ээр хэлэлцүүлэх саналаа дэвшүүлсэн. Гэсэн ч БНСУ үүнийг хүлээж аваагүй болно. 　　3.         Цаашилбал, 2012 оны 8 дугаар сард БНСУ-ын тухайн үеийн Ерөнхийлөгч И Мён-бак Ерөнхийлөгчийн хувиар анх удаа Такэшимад очсонд манай улс нот бичгээр дамжуулан Такэшима арлыг эзэмших эрхтэй холбоотой маргааныг Олон улсын шүүх (ICJ)-ээр хэлэлцүүлэх саналаа дахин тавьсан боловч тухайн сардаа БНСУ манай улсын саналаас татгалзсан (жич 2).
(Жич 1) 1954 онд АНУ-ын зүгээс Олон улсын шүүх (ICJ)-ээр хэлэлцүүлэх саналыг БНСУ-ад мөн л санал болгож байв. 1954 онд БНСУ-ад айлчлал хийгээд ирсэн Элчин сайд Ван Флийт (Van Fleet)-ийн бичсэн тайланд “АНУ нь Такэшимаг Японы газар нутаг хэмээн үзэж байгаа боловч энэ асуудлаар Олон улсын шүүх (ICJ)-ээр хэлэлцүүлэх нь зүйтэй гэдэг байр суурьтай байгаа ба уг саналыг БНСУ-ад албан бусаар тавьсан” гэж тэмдэглэгдэн үлдсэн байдаг.
 

　　　　 
 
 　　　　▲ Элчин сайд Ван Флийт (Van Fleet)-ийн бичсэн тайлан (хуулбар)
 
　　(Жич 2) Олон улсын шүүх (ICJ) нь зөвхөн маргаанд холбогдогч талууд бүгд уг шүүхээр шийдвэрлүүлэхээр тохиролцсоны үндсэн дээр хянан шийдвэрлэх ажиллагааг эхлүүлдэг зохион байгуулалттай байдаг. Манай улс нь олон улсын хамтын нийгэмлэгийн “Хуулийн засаглал”-ыг хүндэтгэх үүднээс 1958 оноос хойш харилцагч улсын зүгээс харилцан тохиролцоонд хүрэлгүйгээр дангаараа манай улсын эсрэг зарга мэдүүлсэн тохиолдолд ч Олон улсын шүүх (ICJ)-ийн шийдвэр нь заавал биелүүлэх хүчинтэйг зарчмын хувьд хүлээн зөвшөөрдөг. Харин Өмнөд Солонгос бол ийм байр суурь баримталдаггүй. Иймээс манай улс дангаараа зарга мэдүүлсэн ч БНСУ өөрөө хүлээн зөвшөөрөөгүй тохиолдолд Олон улсын шүүх (ICJ)-ийн шүүн таслах эрх үүсдэггүй.


‣ Элчин сайд Ван Флийт (Van Fleet)-ийн бичсэн тайлан (PDF)