2026 оны Япон Улсаас Монгол Улсад суугаа Элчин сайдын өргөмжлөл гардуулах ёслолын арга хэмжээ болов

2026/11/16
1 Элчин сайд М.Игавахара мэндчилгээ дэвшүүлэв
2 “UB Drums” хамтлаг уран бүтээлээсээ толилуулав
   11 дүгээр сарын 13-ны өдөр Элчин сайдын өргөөнд 2026 оны Япон Улсаас Монгол Улсад суугаа Элчин сайдын өргөмжлөл гардуулах ёслолын арга хэмжээ зохион байгуулагдлаа. Уг өргөмжлөлийг Япон, Монгол хоёр орны харилцааг хөгжүүлэхэд хувь нэмэр оруулсан хувь хүн болон байгууллагад олгодог бөгөөд энэ удаа дараах 2 хүн хүртлээ.
   Ёслолын арга хэмжээнд өргөмжлөл хүртэгсдийн гэр бүл, хамт олон байлцсан бөгөөд Элчин сайд М.Игавахара тэдний өнөөг хүртэлх гавьяа, зүтгэлийг өндрөөр үнэлэн өргөмжлөлөө гардууллаа.
 
  • Г.Занабазарын нэрэмжит Дүрслэх урлагийн музейн захирал, урлаг судлалын ухааны доктор Пүрэвсүхийн Байгалмаа
   2020 оноос Г.Занабазарын нэрэмжит Дүрслэх урлагийн музейг удирдан ажиллаж буй П.Байгалмаа захирал 2000-аад оны эхэн үеэс Японы уран бүтээлчдийн олон удаагийн үзэсгэлэнг зохион байгуулж ирсний дотор 2022 онд болсон Япон Улс, Монгол Улсын хооронд дипломат харилцаа тогтоосны 50 жилийн ойгоор “Япон постер”-ын үзэсгэлэн гаргаж, японтой холбоотой олон төрлийн соёлын арга хэмжээг санаачлан хэрэгжүүлсэн юм. 2023 онд Япон сангийн нүүдлийн “Японы хүүхэлдэйн үзэсгэлэн”-г Монголын үзэгчдэд хүргэснээс гадна ирэх 2027 онд ч “Японы гайхамшигт ур чадвар” нэртэй үзэсгэлэнг хамтран хэрэгжүүлэхээр төлөвлөөд байна. Тэрээр Япон орны урлаг соёл, тэр дундаа дүрслэх урлагийн үнэ цэнэ, өв уламжлалыг гүнээ ойлгон хүндэтгэж, олон жилийн хамтын ажиллагаагаа үргэлжлүүлсээр байна.
 
  • “UB Drums” хамтлагийн үүсгэн байгуулагч Баттөмөрийн Ганхөлөг
   Морин хуурын найрал хөгжмийн цохивор хөгжимчин байсан Б.Ганхөлөг 1999 онд Японы тайко бөмбөртэй анх танилцсанаасаа хойш Японы уламжлалт бөмбөрийн урлагийг мэргэжлийн түвшинд тоглох замналаа эхлүүлжээ. 2015 онд Япон бөмбөрийн “UB Drums” хамтлагаа үүсгэн байгуулж, эдүгээ 30 орчим гишүүдийг удирдан, хөгжмийн ур чадвараас гадна японы ёс зүй, соёлыг өвлүүлэн зааж байна. Түүнчлэн “Жапан фестивал” зэрэг японтой холбоотой арга хэмжээнүүдэд идэвхтэй оролцон тоглолтоо толилуулж, Монголд Японы өвөрмөц хөг аялгууг хүргэсээр байна.
 
3 Г.Занабазарын нэрэмжид ДУМ-ын захирал П.Байгалмаад өргөмжлөл гардуулав
4 “UB Drums” хамтлагийн үүсгэн байгуулагч Б.Ганхөлөгт өргөмжлөл гардуулав
5 П.Байгалмаа захирлаас Элчин сайдад бэлэглэсэн уран бүтээлүүдийг дэлгэн толилуулав
6 Дурсгалын зураг