29 дэх удаагийн сургууль хоорондын япон хэлний уран илтгэлийн тэмцээн зохион байгуулагдав

　11 дүгээр сарын 19-ний өдөр, Монгол дахь Японы ЭСЯ Монголын Япон Хэлний Багш нарын Холбоо, Монгол-Японы Хүний Нөөцийн Хөгжлийн Төв, ШУТИС-ийн Газдаад хэлний сургууль болон Япон сантай хамтран зохион байгуулан ивээн тэтгэгчээр Монгол дахь Япончуудын холбоо, Монгол Японы худалдааны танхим  оролцсон “29 дэх удаагийн сургууль хоорондын япон хэлний уран илтгэлийн тэмцээн” Монгол-Японы Хүний Нөөцийн Хөгжлийн Төвд болж өнгөрлөө.
　　Нээлтэд оролцсон Дэд тэргүүн Ш.Кикүма “Энэхүү уран илтгэлийн тэмцээн Та бүхний өдөр тутмынхаа япон хэл сурсан үр дүнгээ харуулахын хамт цаашид улам бүр чадвараа дээшлүүлэн шинэ зорилгоо олж авна гэдэгт итгэж байна. Та бүхэн япон хэлээ цаашид ч үргэлжлүүлэн сурч ирээдүйд бүхий л салбарт Япон, Монголыг холбох гүүр болох боловсон хүчин болоосой гэж хүсэж байна” хэмээв.
　Тэмцээнд эхний шалгаруулалтад тэнцсэн ахлах сургуулийн бүлгийн 10 сурагч, их сургуулийн бүлгийн 9 оюутан өөрсдийн өдөр бүрийн хичээл зүтгэлийнхээ үр дүнг харуулж, сэтгэлээ шингээсэн уран илтгэлээ толилиуллаа. Тэмцээний эхний байрт шалгарсан доорх 8 оролцогчдыг “JENESYS” хөтөлбөрийн хүрээнд Япон Улстай танилцах аялалд оролцох эрхээр шагнав.
 
　Ахлах сургуулийн бүлэг
　　1-р байр                     Монгол тэмүүлэл сургуулийн сурагч С.Сансармаа
　　2-р байр                     18-р сургуулийн сурагч Ч.Номин
　　3-р байр                     Монгени сургуулийн сурагч Ж.Нандин-Эрдэнэ
　　Тусгай байр Шинэ Монгол Харүмафүжи сургуулийн сурагч Г.Эмүжин
 
   Их сургуулийн бүлэг
　　1-р байр               МУИС-ийн ХЗС-ийн Нагоягийн их сургуулийн “Японы эрхзүйн боловсрол, судалгааны төв”  О.Бат-Оргил
　　2-р байр                     Монгол Коосэн технологийн коллеж Г.Энхмаа
　　3-р байр                     Монгол-Японы Залуучуудын Хамтын Ажиллагааг Дэмжих төв М.Гүндэгмаа
　　Тусгай байр МУИС-ийн Э.Гэрэлчимэг