Япон Улс, Монгол Улсын хооронд дипломат харилцаа тогтоосны 50 жилийн ойн арга хэмжээ-Японы зурагт хуудасны үзэсгэлэн

　Японы Элчин сайдын яам Г.Занабазарын нэрэмжит Дүрслэх урлагийн музейтэй хамтран Япон Улс, Монгол Улсын хооронд дипломат харилцаа тогтоосны 50 жилийн ойн хүрээнд Японы зурагт хуудасны үзэсгэлэнг зохион байгуулж байна. 4 дүгээр сарын 1-ний өдрийн нээлтийн ёслолын үеэр Элчин сайд Х.Кобаяши тэртээ 30 жилийн өмнө үзэсгэлэнд тавигдаж байсан эдгээр зурагт хуудаснуудыг нямбайлан хадгалж, хоёр орны хооронд дипломат харилцаа тогтоосны 50 жилийн ой тохиож буй энэ жил дахин олон нийтийн хүртээл болгож буй Г.Занабазарын нэрэмжит Дүрслэх урлагийн музейд талархлаа илэрхийллээ. Мөн Соёлын дэд сайд М.Батбаяр Япон, Монголын олон жилийн түүхт соёлын харилцаанд оруулсан өмнөх үеийнхэний хичээл зүтгэлд талархал илэрхийлэв. Г.Занабазарын нэрэмжит Дүрслэх урлагийн музейн захирал П.Байгалмаа Япон Улстай хамтын ажиллагааны хүрээнд олон төсөл хэрэгжүүлж ирсэн тухай танилцуулан, дипломат харилцаа тогтоосны 50 жилийн ойг тохиолдуулан хоёр орны харилцаа улам бүр хөгжихийг хүсэн ерөөв.
Японы зурагт хуудасны үзэсгэлэн 4 дүгээр сарын 17-ны өдрийг дуустал Г.Занабазарын нэрэмжит Дүрслэх урлагийн музейд үргэлжлэх болно. Түүнчлэн долоо хоног бүрийн Бямба гарагт доорх япон соёлыг танилцуулах өдөрлөг, арга хэмжээг зохион байгуулагдах тул Та бүхнийг өргөнөөр оролцохыг урьж байна.
4 дүгээр сарын 2     14:00-  “Кэндама” японы үндэсний тоглоомын танилцуулга
/Монголын Кэндамагийн Холбоо/
4 дүгээр сарын 2     16:00-  “Тайшё-Кото” японы үндэсний хөгжмийн танилцуулга
/JM сургалтын төв/
4 дүгээр сарын 9     14:00-  “Зурагт хуудаст мөнхөрсөн Япон орон” лекц
/Япон судлаач, орчуулагч Д.Төмөрбаатар/
4 дүгээр сарын 16   14:00-  “Япон цайны ёслол”танилцуулга
/МУИС-ийн ОУХНУС-ийн захирал, доктор С.Баттулга/