МУИС болон Төрийн ордонд Японы Олон Улсын Их сургуулийн Олон улсын бизнесийн судалгааны тэнхимийн дэд профессор Г.Фүнабаши лекц тавив.

      5 дугаар сарын 15-ны өдөр, Японы Олон Улсын Их сургуулийн Олон улсын бизнесийн судалгааны тэнхимийн дэд профессор Г.Фүнабаши “Японы аж үйлдвэрийн хөгжил ба Япон маягийн менежмент” хэмээх сэдвээр МУИС-д лекц тавив. Тус арга хэмжээнд Элчин сайд Х.Кобаяши, МУИС-ийн Эрдэм шинжилгээ эрхэлсэн захирал Б.Баяртогтох болон “ЖАЙКА”-гийн Монгол дахь төлөөлөгчийн газрын дарга Ш.Танака нарын хамт оролцсон бөгөөд тэрээр мэндчилгээний үгэндээ Япон Улс нь “Хүн” болон “Технологи”-ийг хамгийн том нөөцөө болгон, дайны дараа тогтворгүй олон улсын нөхцөл байдал дунд дэлхийд 2-рт эрэмбэлэгдэх их гүрэн болж сэргэн хөгжиж чадсан түүхээс Монгол Улс суралцаж, цаашдын хөгжил дэвшилийн замдаа сургамж болгон ашиглахыг хүсэж байгаагаа илэрхийлэв.

      Мөн, 5 дугаар сарын 16-ны өдөр, УИХ-ын тамгын газар болон “ЖАЙКА” хамтран төрийн ордонд зохион байгуулсан арга хэмжээнд “Японы аж үйлдвэрийн хөгжил ба жижиг дунд үйлдвэр” хэмээх сэдвээр дэд профессор Г.Фүнабаши илтгэл тавив. Тус илтгэлд УИХ-ын дарга Г.Занданшатар, Үйлдвэржилтийн бодлогын байнгын хорооны дарга Т.Энхтүвшин болон холбогдох салбарын төлөөлөл 100 орчим хүн оролцлоо.