Япон улсад тусламж үзүүлсэн дэлхийн улс орнуудад хандсан Япон Улсын Ерөнхий сайд Наото Каны мэдэгдэл
2011 оны 3 сарын 22
Манай орны Зүүн хойд бүс нутагт болсон газар хөдлөлттэй холбогдуулан тусламжийн гараа сунгасан дэлхийн 130 орчим орон, олон улсын 30 гаруй байгууллага болон дэлхийн өнцөг булан бүрээс эмгэнэл илэрхийлж, тусламж үзүүлсэн хүмүүст чин сэтгэлээсээ талархал илэрхийлж байна.
Дэлхийн олон орон аврагчид, эрэлч ноход, цөмийн эрчим хүчний мэргэжилтнээ илгээж, Япон дахь АНУ-ын цэргийн хүчин аврах ажиллагаанд оролцох зэргээр хүн хүчний туслалцаа үзүүлсний зэрэгцээ хоол хүнс, эм тариа, дулаан хөнжил зэрэг эд материалын хандив үзүүлсээр байна. Мөн 670 гаруй төрийн бус байгууллага манай улсад туслахаа илэрхийлээд байна. Энэ бүгд нь "Зовох цагт нөхрийн чанар танигдана" хэмээх үгийг бодитоор мэдрүүлж, Японы ард түмэнд туйлын их дэмжлэг болж байгаа билээ.
Хүчтэй газар хөдлөлт, цунами болсны дээр атомын цахилгаан станцад осол гарч, Япон улс урьд өмнө тохиолдож байгаагүй хямралтай тулгараад байна. Олон улсын хамтын нийгэмлэгийн гишүүн орнуудаас үзүүлсэн тусламж дэмжлэгтэйгээр Японы ард түмэн мэргэн ухаанаа дайчилж, үүссэн бэрх нөхцөл байдлаас гарахын тулд бүхий л хүч бололцоогоо шавхан энэ бэрх цагийг даван туулж чадна гэдэгт миний бие итгэл төгс байна.
Эцэст нь халуун сэтгэл гарган, тусламж үзүүлсэн бүх улс орнуудад Японы ард түмнийг төлөөлж дахин гүн талархлаа илэрхийлье.
Япон Улсын Ерөнхий сайд
Наото Кан