3 сарын 11-ний өдөр Японы Зүүн хойд бүс нутагт газар хөдөлснөөс хойш нэг долоо хоног өнгөрлөө. Юуны өмнө, энэ газар хөдлөлт, цунамигийн улмаас олон хүн эрдэнэт амиа алдсанд чин сэтгэлээсээ эмгэнэл илэрхийлж байна. Мөн одоо ч гамшгийн голомтод сэргээн босголтын ажиллагаанд бүхий л хүчээ дайчилж байгаа бөгөөд нэг өдрийн өмнө болтугай хурдан сэргээн босгохыг хүсч байна.

　Энэ газар хөдлөлт нь 9.0 магнитут хэмээх урьд өмнө болж байгаагүй асар хүчтэй газар хөдлөлт байлаа. Газар хөдлөлт, өндөр цунамигийн улмаас урьд өмнө тохиолдож байгаагүй томоохон байгалийн гамшиг тохиосон ба газар хөдлөлтийн дараахан Монголын Засгийн газар, Моиголын ард түмнээс надад болон тус Элчин сайдын яаманд эмгэнэл илэрхийлэхийн хамт эмгэнэлийн захидал ирүүлэхийн зэрэгцээ тусламж болгон мөнгө хандивлах санал гаргасан билээ. 11-ний өдөр газар хөдөлсний дараахан Ерөнхийлөгч Ц. Элбэгдорж, Япон Улсын Цог Жавхлант Эзэн Хаанд эмгэнэлээ илэрхийлэхийн хамт 12-ны өдөр, томилолтоор ажиллаж байсан Говь-Алтай аймгаас над руу утсаар ярьж, эмгэнэл илэрхийлсэн юм. Мөн Ерөнхий сайд С. Батболд газар хөдлөлтийн дараахан буюу 11-ний өдрийн 15 цаг 15 минутад ЖАЙКА-ийн сайн дурынхантай хийх уулзалтын үеэр нэн түрүүнд эмгэнэлээ илэрхийлсэн. Үүнээс гадна УИХ-ын дарга Д. Дэмбэрэл, ГХ-ны сайд Г. Занданшатар, УИХ дахь Монгол, Японы Парламентын бүлэгээс эхлүүлээд маш олон монгол иргэдээс эмгэнэлээ илэрхийлэхийн хамт, эмгэнэлийн захидал хүлээн авсан. Түүнчлэн, олон хүмүүс гамшигт туслахаар мөнгө хандивлах санал гаргасан билээ. Үүгээр Монголчууд та бүхний энэхүү халуун сэтгэлд дахин гүн талархлаа илэрхийлэхийг хүсч байна.

　　Мөн түүнчлэн, Монгол Улсын Засгийн газар газар хөдлөсний дараа нэн яаралтай арга хэмжээ авч, 12-ны өдрийн Засгийн газрын ээлжит бус хуралдаанаар Японы гамшигт нэрвэгдсэн хүмүүст үзүүлэх 1 сая ам. долларын тусламж болон ойролцоогоор 2,500 ш хөнжил илгээхээр шийдвэрлэсэн тухай Шадар сайд М. Энхболд надад мэдэгдсэн билээ. Цаашилбал, ОБЕГ-ын аврагч нар гамшгийн голомтод яаралтай аврах багийн ажиллагаанд оролцохоор 15-ны өдрийн үдээс хойш Наритагийн нисэх буудалд буусан. Одоогийн байдлаар 12 аврагчид гамшгийн голомтод сэргээн босгох үйл ажиллагаанд оролцож байна. Монгол Улсаас манай улсад зөвхөн мөнгөн болоод эд материалын төдийгүй энэ мэтчилэн аврагч илгээх хэмээх хүн хүчний тусламж үзүүлсэн нь анхных юм. Энэ удаагийн Монгол улсаас үзүүлж буй тусламжаар дамжуулан манай хоёр орны харилцаа одоо "Стратегийн түншлэл"-ийг бий болгохоор тууштай хөгжиж буйг бодитоор мэдэрч байна. Үүнд Монголын Засгийн газар, Монголын ард түмэн Та бүхэнд гүн талархлаа дахин илэрхийлье.

　　Эцэст нь, Та бүхэнд мэдэгдэх зүйл байна. Тус Элчин сайдын яам удахгүй хандивын данс нээхээр төлөвлөж байна. Уг дансны талаархи тодорхой мэдээллийг данс нээх бэлтгэл ажил дуусмагц ЭСЯ-ны вэб хуудсаар дамжуулан мэдэгдэх болно. Мөн энэ газар хөдлөлтөд маш олон хүмүүс өртөн амь алдсантай холбогдуулан 17, 18-ны өдрүүд мөн 21-нээс 23-ны хооронд тус тус үдээс хойш 14:00-17:00 цагийн хооронд ЭСЯ-нд эмгэнэлийн дэвтэр нээх болсныг давхар мэдэгдье.

Япон Улсаас Монгол Улсад суугаа Элчин сайд

Такүо КИДОКОРО