"Кизүна"
/Анд нөхдийн барилдлага/
-Япон Улсын Ерөнхий сайд Наото Каны үг-
2011 оны 4 сарын 11
Манай улсад арван гурван мянга гаруй хүний эрдэнэт амийг авч одсон аймшигт гамшиг нүүрлээд даруй нэг сар өнгөрлөө. Одоо хир нь арван дөрвөн мянга гаруй хүн сураггүй алга болж, зуун тавин мянга гаруй хүн хорогдох байранд өдөр хоногийг өнгөрүүлж байна. Япончууд төдийгүй Японд амьдардаг гадаадын иргэд болон энэ гамшигт нэрвэгдсэн бүх хүмүүст болон тэдгээрийн ар гэрийнхэнд гүн эмгэнэлээ илэрхийлье.
Фүкүшимагийн нэгдүгээр атомын цахилгаан станцад үүссэн нөхцөл байдлыг намжаахын тулд бүхий л нөөц бололцоогоо дайчилж, аль болох хурдан байдлыг тогтворжуулахаар хичээн ажиллаж байна.
Өнгөрөгч нэг сар Япончуудын хувьд туйлын бэрх үе байсан хэдий ч биднийг дэлхий нийттэй хамт гэдгийг улам бүр мэдрүүлсэн, талархах сэтгэлээр дүүрэн өнгөрсөн өдрүүд байлаа.
Өнөөдрийг хүртэл дэлхийн 130 гаруй улс, 40 гаруй Олон улсын байгууллага болон маш олон төрийн бус байгууллага, хувь хүмүүс харамсалаа илэрхийлж, мөнгөн хандиваар тусалж, хамтарч ажиллаа. Олон орон аврагчдаа илгээж, гамшигт нэрвэгдсэн хотуудад яаралтай тусламжыг үзүүлсэнээс гадна, хоол хүнс, эм тариа, дулаан хөнжил зэрэг эд материалын тусламж нь гамшигт өртсөн ард иргэдэд туйлын их урам зоригийг хайралсан билээ. Мөн алс хол орны хүүхэд багачууд гамшигт өртсөн хотуудыг хурдан сэргэж хэвийн байдалдаа ороосой хэмээн сэтгэлдээ залбирч, хичээнгүйлэн хийсэн цаасан шувуугаа илгээсэн билээ.
Монгол Улсын Засгийн газар, газар хөдөлсний дараах өдөр нэн яаралтай арга хэмжээ авч, Засгийн газрын ээлжит бус хуралдаанаараа аврах баг илгээж, мөнгөн болон эд материалын хандивыг үзүүлэхээр шийдвэрлэсэн билээ. Мөн олон байгууллага, хувь хүмүүс эмгэнэлээ илэрхийлж, тусламжын гараа сунгасан юм. Монголчууд та бүхэн "зовох цагт нөхрийн чанар танигдана" гэдэг. Энэ аймшигт гамшгийн үед үзүүлсэн монголчуудын тусламж бэрх цагийг даван туулах гэж тэмцэж буй Японы ард түмэнд андын халуун сэтгэл, урам зоригийг хайралсан билээ.
Монгол улс болон тусламж үзүүлсэн дэлхийн нийт улс орнуудад Японы ард түмнийг төлөөлөн чин сэтгэлээсээ талархалаа илэрхийлье.
Япон орон гарцаагүй хөл дээрээ босч, дахин сэргэж, урьд урьдынхаасаа ч илүү сайхан орон болох болно. Дэлхий нийтийн халуун дулаан тусламж дэмжлэгийн хариуд бид дахин сэргэх замдаа орох нь та бүхний өмнө хүлээсэн үүрэг төдийгүй хамгийн эрхэм хариу талархалын илэрхийлэл юм. Энэ бүхэн Японы ард түмний шавхагдашгүй мэргэн ухаан болон дэлхий нийтийн тусламжын хүчинд гарцаагүй биелэлээ олно гэдэгт миний бие итгэл төгс байна. Япон улс олон улсын хамтын ажиллагаанд оруулах хувь нэмрээрээ дамжуулан халуун сэтгэлээр тусламжын гараа сунгасан та бүхнийхээ ачийг хариулах болно.
Тэр өдрийн төлөө миний бие сэргээн босголтонд бүхий л хүч чадлаа зориулан ажиллаж байна.
Япон Улсын Ерөнхий сайд
Наото Кан
Зовох цагт нөхрийн чанар танигдана